噢~張床好細張.....起身食早餐，一心諗住山區酒店早餐一定係一般貨色，點知出奇的好，有鄉村硬麵包之餘，仲有香檳飲，正！原來晨早溜溜飲杯香檳係咁爽，整兩杯先~

食飽飽就行古城，行幾步影幾張相，又行幾步影幾張相，我哋終於搣甩成班團友。集合時間係1145 hrs.，可以慢慢影~

影到咁上下就搵手送買，記得上次嚟時買過把開信刀俾大丙，今次嚟想買把俾美怡，但搵極都搵唔返間舖頭，都唔知係咪執咗。算~買隻杯仔俾自己先~~

食完午飯、瞓個大午睡，經過好多風力發電，大約4點半，就去到維也納。由於明天係星期日關係，好多商店都會唔開舖，有多多錢都無用。所以一落車，行過咗一段路，領隊講完集合時間地點後，就一支箭帶團友去掃名店。由於係星期六，人又超多，結果跟甩咗。唯有自己一班人行，周圍供下。行行下，連猪女都唔見埋，無理由架，佢班親戚喺度影緊相喎？正當我周圍搵猪女嘅時候...我發現有Channel店！我當堂明白哂，有人見到Channel，連親戚都唔理....等我行完Gucci、LV、D&G 至執翻佢。

行過又影【約翰史特勞斯黃金像】~

之後上返旅遊巴、行一大段路去食維也納出名嘅吉烈豬扒餐。依塊豬扒令我諗起亞媽，因為味道同我亞媽整嘅一樣，但我亞媽塊豬扒有肉汁，佢無。返酒店，酒店係3星Airo Tower Vienna